قطرة علم خير من بحر عبادة

الكلمة دى عجيبة جدا ، لاننا للاسف اتعودنا فى علاقتنا مع ربنا بالحساب كاننا بنتعامل مع البشر!! آه انا صليت السنة يبقى حاخد كذا حسنات آه صمت يبقى كذا انا اتحجبت يبقى مش حادخل النار!!! لا لا لا........احنا فاهمين غلط او انا عالاقل كنت باحسبها كده لكن اكتر ناس فهموا الحكاية دى وطبقوها السلف الصالح ، عشان كده ازهى عصورالدولة الاسلامية كانت فى وقتهم ، انتوا عايزين تفهموا انا باتكلم على ايه حاقولكم ابن عباس رضى الله عنه كان معتكف فى صحن الكعبة (عقبالنا كلنا يا رب) وبعدين جه واحد من المسلمين همس فى ودنه بكلام فالناس لقت ابن عباس قام مع الراجل وساب الاعتكاف!!!! طبعا الناس قالت ابن عباس مايسبش الاعتكاف غير لو فى مصيبة حصلت ،وفعلا اول ما ابن عباس رجع سالوه فى ايه فقالهم الراجل كان قاصدنى فى خدمة (بما معناه طبعا) فالناس بصوا لبعض وقالوا له يا ابن عباس سبت الاعتكاف فى المسجد الحرام علشان واحد عايز خدمة فقال سمعت رسول الله صلى الله عليه وسلم يقول:

"من فرج عن مؤمن كربة من كرب الدنيا فرج الله عنه كربة من كربات يوم القيامة، ومن يسر على معسر يسر الله عليه"

طب انت كده لو قعدت تفكر فيها بالطريقة بتاعتنا حتيجى؟؟؟؟؟!!! انا عن نفسى مش عارفة اتخيلها ، ده ايه الكرم ده، ولا اسمع اللى جاية دى، و عن ابن عباس رضي الله عنهما : عن النبي صلى الله عليه و سلم قال )من مشى في حاجة أخيه كان خيرا له من اعتكاف عشر سنين ومن اعتكف يوما ابتغاء وجه الله جعل الله بينه و بين النار ثلاثة خنادق كل خندق أبعد مما بين الخافقين ) رواه الطبراني و الحاكم و قال صحيح الإسناد إلا أنه قال : ( لأن يمشي أحدكم مع أخيه في قضاء حاجة و أشار (بأصبعه) أفضل من أن يعتكف في مسجدي هذا شهرين ).

ياجماعة احنا محتاجين نبدا نفهم الدين ونعرف ان للاسف الامريكان فهموها بس للدنيا مش للاخرة عندهم مثل بيقول think smarter not harder يعنى ماتبقاش حمار وشغل مخك!!!!

انتوا لو عرفتوا انا باحكى كل الكلام ده ليه اصلا!! عندى كومبيوتر كان باظ(ضرب بالبلدى) فوديته لمهندس ظبطته وحطله ويندوز(طبعا نسخة متقلدة) فبعد ما اشتغل بدا يطلع الرسالة اللى ظهرت للناس كلها فى العالم كله(ان انت لازم تعمل له اكتيفيشن فى خلال 30 يوم)وطبعا احنا خدنا الموضوع بهزار(هو معقول بيل جيتس حيستقصد الغلابة!!!)لحد ما الويندوز قفل فعلا والكومبيوتر تعيش انت!!! كان ممكن اروح تانى يوم لمهندس عشان انزل ويندوز من تانى لكن وآه من لكن كسلت لانى عندى واحد قديم فاشتغلت عليه وطلع روحى بطىء جدا وان مستخسرة الاربعين جنيه اللى حاديهم للمهندس ولسه حاشيله على قلبى واركب تاكسى بعشرة جنيه رايح جاى!!! قعدت متعذبة بالكومبيوتر القديم ابن القديم شهر بحاله لحد ماانتوا عارفين.....د


(دعيت ربنا)المشكلة ان الواحد فاكر نفسه حاجة فبينسى يدعى او بيقول هو انا حادعى فى حاجة هايفة زى دى!!! مع ان الدعاء مخ العبادة هو ده دليل ذلك واحتياجك لربنا عشان كده "ادعونى استجب لكم ان الذين يستكبرون عن عبادتى سيدخلون جهنم داخرين" يعنى اللى ما يدعيش كانه بيقول شكرا مش محتاجين عشان كده ادعى ربنا فى كل حاجة وفى اى حاجة ،نرجع لمرجوعنا انا دعيت ربنا من هنا فربنا الهمنى (طب ما تعملى سيرتش على جوجل يمكن تلاقى حل للمشكلة دى) وما كدبتش خبر وقمت عملت كده وفوجئت بملايين المواقع عارضة الاف السوفت ويرز عشان تحلى المشكلة دى ،بس كلها بتتطلب انى انزل برنامج عالويندوز وهو يحل المشكلة ، وانا الويندوز عندى كان اتقفل ومش حايتفتح غير لو عملت اكتيفيشن ، قلت احط product key من اللى موجودين عالنت مانفعش ،قلت يا رب تانى فربنا الهمنى طب ما تفتحى اليوتيوب يمكن فى فيديو يحل المشكلة؟؟؟ وقعدت عاليوتيوب 3 ايام وشفت فيديوهات كتير بتحل المشكلة بس للى لسة فى فترة السماح لحد............ ما لقيته.......(موسيقى تصويرية)....... والمشكلة ان حلها طلع سهل جدا لدرجة ما تخطرش على بال حد!!! يا نهار ابيض السهل الممتنع!! هو الواحد غبى للرجةدى!!!لا وايه مايخدش دقيقتين (الطم) عرفتوا بقى ليه قطرة علم خير من بحر عبادة...................